CEBU, Philippines - Maayong pagkaigo sa bugan sa usa ka lalaki human kini gipusil sa iyang kaduwa sa hantak nga gikalalis niini pasado alas-9 sa miaging adlaw sa Sitio Immaculada, Barangay Nangka sa lungsod sa Balamban.
Ang biktima naila nga si Dexter Briones Rosario alyas Bodoy, 24, habal-habal drayber, molupyo sa nahisgotan nga lugar.
Ang suspek naila nga si Richard Senarlo, 47, silingan ra sab sa biktima. Base sa imbestigasyon sa kapolisan, ang biktima naglingkod lang sa usa ka payag dihang miabot ang suspek nga pwerteng sukoa dayong pusil niini duha ka higayon diha sa abaga ug bugan hinungdan sa pagkahagba niini sa yuta. Ang suspek daling miikyas samtang gidala sa tambalanan ang biktima. Nasayran nga nagkalalis ang duha tungod sa hantak. Duha ka basiyo sa bala sa kalibre .45 ang nakuha sa crime scene. (BANAT NEWS)