CEBU, Philippines - Ang Cebu City Traffic Operations Management (CITOM) may 239 lang ka traffic enforcers. Kuwang sila kaayo nga ikadestino sa ubay-ubay nga mga dapit dinhi sa dakbayan.
Gani ang CITOM misugyot nga modugang sila og 70 ka bag-ong traffic enforcers ug may resolusyon na nga napadangat didto sa City Hall kabahin niini.
Apan samtang nagkuwang ang CITOM ug mga traffic enforcers nga ikadestino sa mga dapit nga mahulagway nga gubot ang trapiko, ngano nga aduna may mga traffic enforcers nga magtinagutlo sa usa ka puwesto?
Nasakpan sa Banat Manobela kini’ng tulo ka enforcers nga naglumpong sa usa ka puwesto sa eskena General Maxilom ug Echavez, paingon sa Caretta. (BANAT NEWS)