Habal-Habal drayber gi-ulo pagpusil

CEBU, Philippines – Grabeng pagka-angol sa usa ka habal-habal drayber nga gipusil sa ulo samtang angkas ang iyang asawa sa Poblacion, dakbayan sa Danao alas 6 pasado niadtong Huwebes sa gabii.

Si PO2 Ronald Gomez sa Danao City Police Station miila sa biktima nga si Roberto Meca Jaime, Jr., 34, minyo ug nagpuyo  sa maong dapit.

Matud ni Gomez nga samtang nagdagan padulong sa ilang panimalay ang biktima, kalit lang mi-overtake ang Neo nga puti nga motorsiklo nga giluwanan sa duha ka wala hiilhing lalaki.

Ang nag-angkas maoy miibot sa armas ug gipusil ang biktima sa ulo ug dayong pabulhot pahilayo sa maong dapit.

Ang biktima nga natapsingan sa iyang tuong tampihak daw  nawad-an sa kontrol sa gimanehong habal-habal nga nakaingon sa ilang pagsaliring sa daplin sa karsada hangtud nga natumba.

Wala hinuon maunsa ang asawa apan ang biktima nga nakaangkon og tapsing sa samad pinusilan dapit sa tuong tampihak ang daling gihatud sa Danao District Hospital.

Si Gomez miingon nga human sa pasiunang pagtambal sa mga doktor sa maong tambalanan, ang biktima gibalhin sa Vicente Sotto Memorial Medical Center sa dakbayan sa Sugbo. - /GMR (BANAT NEWS)