CEBU, Philippines- Gipahibawo sa Regional Tripartite Wages and Productivity Board (RTWPB-7) nga sa sunod buwan ilang susihon ang gipatuman nga Cost of Living Allowance (COLA) sa mga mamumuo sa Central Visayas.
Matud ni RTWPB-7 chairman ug Department of Labor and Employment (DOLE-7) Regional Director Chona Mantilla nga ilang tukion kon ang P13 nga COLA angayan ba nga iapil sa suhulan sa mga mamumuo nga magsilbing usbaw nga gipangayo alang karong tuiga.
Hinuon ang labor sectors sa Sugbo nipadayag sa ilang pagsupak sa maong lakang.
Usa sa mga labor representatives sa RTWPB-7, Atty. Ernesto Carreon, sa Associated Labor Union-Trade Union Congress of the Philippine (ALU-TUCP), nagkanayon nga gamay ra kaayo ang P13 nga usbaw sa suhulan sa mga mamumuo niining tuiga hinungdan nga ila kining babagan.
Iyang gitug-an nga ang labor sector sa Central Visayas moduso og laing petisyon alang sa pag-usbaw sa suhulan sa mga kawani nga mas daku pa sa P13 nga COLA.
Ilang gitinguha nga maduso ang ilang petisyon sa usbaw sa suhulan sa mga mamumuo sulod niining semanaha. - /GMR) (BANAT NEWS)