CEBU, Philippines - Wala’y nahimo ang kagamhanan sa lungsod sa Minglanilla sa mga manindahay nga namalik sa daang merkdo.
Kini bisan sa presensiya sa kapolisan aron papahawaon ang mga manindahay nga namalik sa ilang pwesto.
Tungod niini, ang kagamhanan nakahukom nga ila’ng ipakoral ang merkado ug kadtong mamugos nga mosulod bawian og pwesto sa bag-ong merkado. Niadtong petsa 8 sa Agosto gipabalhin ang mga manindahay sa bag-ong merkado bisan sa hugot nga pagsupak.
Apan nakalitan ang mga opisyales sa lungsod kay niadtong adlaw’ng Miyerkules kalit namalik ang mga manindahay sa karaang merkado sanglit mas daku sila og kita kaysa bag-ong merkado.
Gipadad-an og pulis ang karaang merkado aron sa paghangyo nga pagawason ang mga manindahay apan wala sila’y nahimo.
Ang municipal administrator, Concordio Mejias, miasoy nga gihatagan nila og higayon nga boluntaryong mogawas ang mga manindahay apan tungod sa pagmagahi nakahukom sila nga koralon.
Nagtuo ang kagamhanan sa lungsod nga mamahawa ra gihapon ang mga manindahay ilabi na nga wala’y linya sa tubig ug kuryente ang karaang merkado human kini giputlan.
Samtang ang hepe sa Minglanilla Police Station, Senior Insp. Richard Gadingan, subling mitataw nga ang presensiya nila sa karaang merkado mao lang ang pagmintinar sa kahapsay ug kalinaw. (BANAT NEWS)