CEBU, Philippines - Girekomendar sa Talisay City Disaster Risk Reduction and Management Council ang dinaliang pag-riprap sa kilid sa Manipis Elementary School sa Barangay Manipis kay wala g’yuy nakita nga laing dapit nga katukoran og bag-ong tunghaan.
Gitinguha ni Mayor Johnny V. De Los Reyes nga magtukod og laing eskwelahan adto sa luwas nga dapit aron luwas ang mga tinun-an gikan sa peligro sa linog ug pagdahili sa yuta. Apan si Manipis Barangay Captain Emma Cabiluna nitug-an nga bisan asa na lang sila sa barangay nangita og kabalhinan sa eskuylahan apan wala gayud sila makakita.
Matud ni Cabaluna nga mahimo’ng ipabilin na lang ang eskuylahan sa mao nga dapit apan kinahanglan nga tangtangon kadtong mga bato nga tua sa ibabaw sa bungtod aron way peligro nga kini maligid paingon sa tunghaan kon kusog ang uwan.
Si Vince Monterde, pangulo sa Talisay Disaster Risk Reduction and Management Officer miingon nga kon ipabilin man ang mao nga tunghaan sa dapit kinahanglan nga i-riprap usab ang ubos nga bahin aron dili na makankan ang yuta.
Ang Mines and Geo-sciences Bureau (MGB) sa Department of Environment and Natural Resources (DENR)-7 mideklarar na nga risgo kaayo ang kahimtang sa mga tinun-an sa Manipis.
Matud ni JVR nga dili siya makatugot nga mahimutang sa kakuyaw ang kinabuhi sa mga tinun-an. (BANAT NEWS)