CEBU, Philippines- Giaprubahan sa konseho sa dakbayan sa Toledo ang kapin sa P48 milyones nga supplemental budget atol sa gipahigayong special session niadtong adlaw’ng Biyernes.
Way misupak sa ikatulo ug kataposang pagbasa ang resolusyon nga giduso ni Councilor Marjorie Perales alang sa Supplemental Budget No. 1 for General Fund nga nagkantidad og P48, 390, 178.
Pito lamang ka mga konsehal ang nitambong sa gipahigayong special session nga sila si Konsehal Merly Abad, Zosimo Abellanosa, Leo Dolino, Antonio Borja, Edgardo Aguilar ug Konsehal James Gaite.
Samtang wala makatambong sila si Konsehal Louis Nicholas Espinosa, Helen Jill Espinosa, Rogelio Caburnay ug Ricardo Pepito tungod sa personal nga hinungdan.
Apan bisan pa man niini naestablisar gihapon sa konseho ang quorum hinungdan nga nagpadayon ang special session nga gipangulohan ni Toledo City Vice Mayor Antonio Yapha Jr. isip presiding officer.
Wala’y bisan usa sa mga konsehal nga mitambong sa special session ang mikwestiyon sa supplemental budget.
Gawas niini giaprubahan usab ang laing kapin sa P30 milyones alang sa development and livelihood fund sa siyudad.
Gikalipay usab sa mga kawani sa Toledo City Hall ang pagpasar sa maong supplemental budget sa siyudad ug nagmalaumon nga mapatuman na ang mga proyekto sa dakbayan ilawom sa pamunoan ni Toledo City Mayor John Henry Sonny Osmeña. - /EIM) (BANAT NEWS)