Gatas sa inahan tigumon

CEBU, Philippines - Ang kagamhanan sa dakbayan sa Sugbo posible nga mo-implementar sa gitawag og “milk bank program” diin ang mga departamento nga hingtungdan giawhag sa paghimo og pagtuon kabahin niini.

Si Konsehal Gerardo Carillo nagkanayon nga ang breast milk o gatas sa inahan ang labing maayo alang sa mga premature ug adunay sakit nga masuso.

Labing maayo kon adunay advocacy kabahin sa “milk banking” diin ang mga gatas sa donor nga mga inahan adto ipundo ug sa maong pamaagi masulbad ang malnutrition ug ubang problema sa panglawas sa mga bag-ong natawo.

Matud ni Carillo nga adunay existing milk bank program karon nga gipasiugdahan sa neonatal intensive care unit sa Philippine Children’s Medical Center (PCMC) sa milabay’ng 10 ka tuig diin ang mga masuso makakuha gihapon sa husto nga nutrients gikan sa gatas sa laing inahan kon ang inahan sa masuso dili kini mahimo nga magpasuso sa ilang anak tungod sa problema sa panglawas.

Ang Cebu City Nutrition Council of the Philippines  (CCNCP)-Cebu City Chapter giawhag nga makigtinabangay sa City Health Department (CHD), Cebu City Medical Center (CCMC), Department of Social Welfare Services (DSWS) ug ang Cebu City Women and Family Affairs Commission (CCFAC) sa pagpahigayon og pagtuon sa posible’ng implementasyon sa milk bank program sa dakbayan sa Sugbo. (BANAT NEWS)

Show comments