CEBU, Philippines - Usa ka kanhi kawani sa Lapu-Lapu City Hall ang gironda sa mga sakop sa Police Regional Office 7 – Regional Anti- Illegal Drug Special Operations Task Group tungod sa pagpamaligya og ilegal nga drugas.
Ang suspek mao si Giovani Toring, 36, kansang balay diha sa Purok Beauty in the Sky sa Barangay Babag nakuhaan og tulo ka medium size nga pakete sa shabu.
Ang raid nga gipangulohan ni Police Inspector Joey Bicoy sa RAIDSOTG pinasikad sa search warrant nga giisyu ni Judge Torribio Quiwag, executive judge sa Regional Trial Court Branch 27 sa dakbayan.
Apan wala madakpi ang suspek gawas lang sa iyang pares nga si Erma Dungog.
Ang nasakmit nga drugas gibana-bana nga moabot og 15 ka gramo ang kabug-aton nga mokantidad tanan og 177,000 ka pesos.
Si Mayor Paz Radaza nagkanayon nga iyahang ipa-verify pag-usab sa iyahang buhatan ang status ni Toring ingon man mga empleyado sa City Hall.
Gimando niya kang acting city police director, Senior Superintendent Armando Radoc paghimo og dugang imbestigasyon niini.
Si Radoc nagkanayon nga aduna siya nadawat nga pahibalo sa RAIDSOTG kabahin sa maong operasyon.
Si Radaza miingon nga kinahanglang ipaubos sa regular, random ug surprise drug test ang mga kawani.
Kadtong masakpan awtomatikong taktakon sa ilang trabaho. (BANAT NEWS)