CEBU, Philippines - Patay ang usa ka trabahante sa National Food Authority human gidunggab sa lalaki nga nagdumot kaniya pasado alas 7 sa miaging Biyernes sa gabii sa sitio Laguna, Pardo, dakbayan sa Sugbo.
Ang biktima naila nga si Dennis Arcete, 38, samtang ang suspetsado naila nga si Rafael Suico alyas Paeng, 40, usa ka security guard ug parehong nagpuyo sa maong lugar. Base sa imbestigasyon sa Homicide Section pinangulohan ni SPO4 Alex Dacua nga si Arcete gikan sa ilang balay dihang gisundan sa suspetsado kinsa nihansak sa kutsilyo pipila ka higayon sa biktima.
Nakaangkon og samad ang biktima sa iyang dughan, tiyan ug wala’ng bahin sa iyang lawas ug daling gidala sa Adventist Hospital, kanhi Miller Hospital, diin gideklarar nga dead on arrival sa mga doctor.
Ang suspetsado dali usab nga milayas human sa maong hitabo. (BANAT NEWS)