CEBU, Philippines- Gipaubos sa kinalit nga drug test ang mga sakop sa Criminal Investigation and Detection Group (CIDG 7 ug Metro) kagahapon sa buntag ubos sa kamandoan sa ilang labaw sa kaulohan.
Si Senior Superintendent Ritchie Posadas ang hepe sa CIDG 7 nga nahinabi sa mga tigbalita mibutyag nga tumong sa maong kalihokan kabahin sa halapad nga pagpanglimpyo sa kapolisan sa tugkaran niini gikan sa mga adis-adis nga polis.
Sumala pa ni Posadas nga dili lang ang mga organic personnel ang gipaubos sa drug test apan giapil ‘sab nila ang ilang mga utility workers.
Miabot sa 15 ka mga sakop sa maong buhatan ang napaubos sa maong drug test, diin upat niini mga utility apan siyam ka sakop nila ang absent.
“This is to show to everybody that we are clean and also to align to PRO 7 program on drug test,” matud pa ni Posadas.
Apan sa hinapos nga bahin sa maong drug test, miabot sa maong buhatan si Cebu City Assistant Prosecutor Mary Ann Castro kinsa miapil ‘sab kini sa maong drug test.
Matud pa ni Castro nga ang iyang trabaho mao ang pagpapriso sa mga drug personalities ug maayo ‘sab nga makita sa katawhan nga sila sa prosecutors office limpyo ‘sab sa drugas.
“I happen to drop by CIDG and they said its random drug test, so, how come you say its random when you are not prepared, so I’m not prepared, so I want to show to the people naa man ‘ta sa drugs court nga negative ‘ta.” matud pa ni Castro.
Hinuon dako ang pagpasalamat ni Posadas nga wala’y nagpositibo atol sa maong drug test.
Ang mga wala katambong sa maong kalihokan ang gusto karon sa opisyal nga patubagon kun lehitimo ba ang ilang rason. - /EIM) (BANAT NEWS)