CCDRRMC nangandam sa bagyong Glenda

CEBU, Philippines- Andam na ang kagamhanan sa siyudad sa Sugbo sa umaabot nga bagyong Glenda kun ugaling mapiskan niini ang Sugbo. Matud ni Konsehal Dave Tumulak pangulo sa Cebu City Disaster Risk Reduction Management Council (CCDRRMC) nga andam na ang ekipo sa kagamhanan alang sa mga posibleng mahitabo.

Gisaka sa blue alert status sa CCDRRMC ang siyudad tungod kay nikusog ang dagan ni Glenda nga gikan sa depression nahimo na kining bagyo. Dunay pito ka ambulansya, 28 ka Kaohsiung buses ug ang 20 ka fire trucks sa siyudad nga 24-oras nga nakaestambay aron moresponde.

Gimandoan na usab ang mga barangay kapitan sa pag-andam sa ilang mga evacuation centers. Samtang ang mga nagpuyo  duol sa mga sapa ug kabaybayonan gipasidan-an na bahin sa maong bagyo. Matud ni Ester Concha, pangulo sa Department of Social Welfare and Services (DSWS) nga nangandam na usab sila og mga relief goods nga ipangapod-apod. - /EIM) (BANAT NEWS)