CEBU, Philippines - Wala pa ihinayon sa Land Transportation Office (LTO) ang paghimo’g operation kabahin sa pagpanakop sa mga drayber sa sakyanan kang kansang plate numbers gitabonan aron dili sayon mabasa.
Kini tungod kay ang mga sakop sa LTO-7 Operations Branch mihatag og una nga pagtagad sa mga kolorum nga sakyanan nga nag-operate sa lalawigan sa Bohol.
Gikareport sayo pa nga kadaghanan sa mga van for-hires nga sagad gigamit sa mga turista sa Bohol walay mga prangkisa. Base sa bag-ong lagda ang mga operators sa van for-hires nga walay prangkisa multahan og P200 mil kun masakpan.
Kabahin sa pagpanakop sa mga drayber nga tinaptapan ang plate numbers, nagubot ang mga tag-iya’g sakyanan diha nga napatik sa pamantalaan ang pahayag sa tigpamaba sa LTO nga si Jason Salvador nga ang bisan unsa nga matang sa plate accessories sama sa tabon, mga bracket ug uban pang makasalipod sa plate numbers pamultahon g’yud.
Si LTO Assistant Secretary Alfonso Tan, Jr. miingon nga wala kaayo sila moestrikto pagpanakop sa mga drayber nga magbutang og plate covers, frames samtang gihimo pa ang implementing rules and regulations (IRR) niini sa JAO-2014-01.
Base sa mga lagda sa JAO 2014-01, ang pagbutang og mga accessories sa bisan unsang matang sa plaka, sama sa plate cover nga itom ug ubang kolor, kamultahan na ang drayber og P5 mil ug embargohon pa ang mga accessories.
Apan base sa daan nga lagda, ang pagtaptap sa plate numbers masakmitan gihapon sa lisensya ang drayber sa sakyanan tungod kay nakalapas siya sa lagda - Obscure Plate. (BANAT NEWS)