CEBU, Philippines - Usa ka lalaking gidudahan sa kapolisan nga “high” sa ginadiling drugas ang gidakop human gisunog ang balay sa iyang kapuyo kagahapon sa kaadlawon diha sa Sitio Upper Awayan sa siyudad sa Carcar.
Si Andres Rensulat, 40 ug lumolupyo sa P. Nellas St. Carcar City gipasanginlang miduslit sa balay sa kapuyo nga si Estrellita Solon, 30, kinsa daling nakapangayo og tabang sa kapolisan.
Matud ni PO1 Miguel Bernabe sa Carcar Police Station nga nangabubho ang suspek kay nagtuo kining dunay laing karelasyon si Solon. Dugang pa ni Bernabe nga base sa ilang pagtan-aw sa taras ni Rensulat atol sa pagkasikop nagduda sila nga naimpluwensyahan kini sa ginadiling drugas.
“Sa among tan-aw aning suspect, sabog pa ni siya,” matud ni Bernabe. Nagkanayon nga mokabat sa P20,000 ang danyos sa sunog. (BANAT NEWS)