Balay nasunog kay 6-anyos nagduwa og lighter

CEBU, Philippines - Usa ka 6 -anyos nga batang lalaki ang nakaikyas gikan sa nasunog nilang balay sa Emerald Subdivision, Barangay Cabancalan, Dakbayan sa Mandaue sa miaging Biyernes sa gabii. Ang balay gipanag-iya ni Guia Tan sumala pa ni SFO1 Julius Lloa, imbestigador  sa Bureau of Fire Protection (BFP) sa Mandaue City.

Matud pa nga nataligam-an sa iyaan ang bata nga nagduwa ug napunitan niini ang lighter ug naduslitan sa bed sheet sa kama.

Matud pa ni Lloa nga sa pagdilaab sa kalayo daw gikuyawan ang bata ug midagan paingon sa gawas nga nagsiyagit nga nakapaalarma kang Tan.

Matud pa ni Lloa nagtinabangay ang mga silingan sa pagpawong sa kalayo nga mikatap na sa balay, hinuon bisan wala hingpit maugdaw ang panimalay nagbilin kini og P100,000 nga danyos.  (BANAT NEWS)