Frat, gang gi-monitor
CEBU, Philippines - Hugot ang pag-monitor sa kapolisan sa dakbayan sa Lapu-Lapu sa mga tinun-an sa high school ug kolehiyo nga dili magpasakop og fraternities aron dili mabiktima sa hazing ug ubang dautang buhat.
Gipahibawo ni Lapu-Lapu City Police Office Director, Sr. Supt. Armando Radoc, nga gibisita nila ang mga eskwelahan aron mohimo og mga seminars sa dili maayong epekto sa pagpasakop og fraternity ug gang.
Apil nilang gitutukan ang mga tinun-an sa high school ilabi na ang naa sa third ug fourth year nga maoy daling madani sa pagsulod sa fraternity.
Adlaw ug gabii nga gibisita pinaagi sa room-to-room campaign ang ilang gihimo sa 14 ka mga tunghaan sa dakbayan.
Ang pagbisita sa mga tunghaan gisugdan sa kapolisan sa miaging adlaw ug matapos kini sa katapusang bahin sa buwan.
Plano karon sa kapolisan nga himoon nila ang maong kalihukan sa matag bukas sa klase aron ilang magiyahan ang mga tinun-an batok sa dautang binuhatan. (/GMR)(BANAT NEWS)
- Latest
