CEBU, Philippines - Milungtad og kapin sa oras ang pagdiskurso ni Mayor Michael Rama sa tinuig niya nga State of the City Address (SOCA) atubangan sa mga konsehal sa dakbayan sa Sugbo kagahapon.
Sa wala pa modiskurso si Rama, si Monsenyor Roberto “Boy” Alesna mihimo og “invocation” ug mipahimulos sa pagpahinumdom sa mga opisyal sa dakbayan nga ayuhon ang ilang trabaho pagserbisyo sa katawhan ug dili gamiton ang ilang gahom sa personal nga katuyoan.
Gibatbat sa mayor ang iyang mga proyekto nga gipasiugdahan sa milabay’ng usa ka tuig ug sa mga giplano pa nga iyang ipatuman sa laing duha pa ka tuig sa iyang termino. Apil sa mga proyekto nga gipasigarbo ni Rama mao ang pagsugod na niya pagpatuman sa “three-meter easement” sa kasapaan, ingon man ang pagpahigayon og reblocking sa mga siot nga residential areas.
Matud ni Rama nga sa miagi’ng tuig ang kagamhanan sa dakbayan nakapatuman og P250 milyones nga kantidad sa drainage projects ug nakapasemento kini og daghang karsada nga gigastohan og P183 milyones ug daghan usab ang gipang-aspalto nga migasto og P265 milyones.
Gipasigarbo ni Rama ang iyang nahimo nga paghawan sa gubot kaayo nga Warwick Barracks nga karon gihimo na nga temporary parking area sa mga sakyanan sa mangomprahay sa Carbon. Si Rama hinuon miawhag og tabang gikan sa mga sakop sa konseho ug sa mga opisyal sa kabarangayan. Giangkon sa mayor nga kun ang mga konsehal dili moabag kaniya dili siya magmalampuson sa iyang mga damgo.
Si Vice Mayor Edgardo Labella midayeg sa matinud-anong mensahe sa mayor nga matud niya gibasi sa dukomento, apan si Konsehal Margot Osmeña ug Konsehal Sisinio Andales, mga sakop sa Bando Osmeña Pundok-Kauswagan (BOPK) wala makontento. (BANAT NEWS)