Mga LGUs mahinungdanong mangandam sa kalamidad

CEBU, Philippines - Gawas sa kasaulogan sa Nutrition Month sa Department of Health (DOH-7), ang Office of Civil Defense (OCD-7) misaulog usab sa National Disaster Consciousness Month karong bulan sa Hulyo ning tuiga sugod kagahapon diha sa Plaza Sugbo sa dakbayan sa Sugbo.

Si OCD-7 Regional Director Olivia Luces miingon nga mahinungdanon nga mangandam ang katawhan sa pag-abot sa kalamidad. Ang tema sa kasaulogan sa OCD-7 sa National Disaster Consciousness Month mao ang "Kahandaan at Kaligtasan ng Pamayanan Pundasyon ng Kaunlaran."

Kini ilabina nga lab-as pa ang kadako ug kalapad sa kadaut nga gibilin  sa 7.2 magnitude nga linog nga niigo sa Bohol ug sa bagyong Yolanda nga nilampurnas sa Leyte, Samar ug amihanang bahin sa lalawigan sa Sugbo sa miaging tuig.

Gisugdan usab sa OCD-7 ang pagpang apod-apod og mga flyers diin makita ang mga pamaagi sa pagpangandam aron mamenusan ang epekto sa kalamidad.

Gipahibawo usab sa OCD-7 nga  mopahigayon usab sila og Calamity Summit sa lalawigan sa Bohol, Siquijor, Negros Oriental ug sa Cebu sulod niining bulana uban ang abag sa nagkadaiyang buhatan sa gobiyerno.

Tumong niini nga ma-update sa mga programa sa OCD ang tanang mga local government units unsaon pagtubag ang mga kalamidad nga posibling moigo sa ilang tagsatagsa ka mga lugar. Ang tema sa kasaulogan sa OCD-7 sa National Disaster Consciousness Month mao ang "Kahandaan at Kaligtasan ng Pamayanan Pundasyon ng Kaunlaran."(BANAT NEWS)