CEBU, Philippines - Hugot nga gipatuman karon sa mga local government units ang gimando sa Department of Health-7 nga sanitary inspection sa tanang edipisyo duol sa mga tunghaan. Kini aron pagseguro nga luwas ang mga tinun-an ug mga ginikanan sa paliton niining pagkaon ug kapuy-an. Ang buhatan ni DOH-7 regional director Jaime Bernadas nagkanayon nga busy na kaayo ang mga sanitary inspectors sa nagkadaiyang lugar sa rehiyon 7 sa pag-inspeksiyon sa mga kan-anan, boarding houses ug lakip na ang mga lodging houses. Susihon sa mga sanitary inspectors kung may mga pansayan ba nga mo-flush labi na ang mga boarding houses.
Gipahibawo ni Bernadas nga gihingusgan usab nila ang kampanya sa proper hygiene and clean environment nga maoy ilang gituohang labing epektibong mekanismo batok sa dengue.
Niabot na sa 1,150 ka mga kaso sa dengue ug lima ang patay ang natala sa ilang buhatan sa tibuok Central Visayas gikan sa buwan sa Enero hangtud sa Mayo ning tuiga.
Apan iyang gitataw nga mas ubos og 81.7 porsiyento ang maong gidaghanon sa kaso sa dengue itandi sa nakalabay nga tuig sa susamang mga buwan nga may 6,294 ka kaso ug 21 ang patay. (BANAT NEWS)