Usa ka bala sa agtang mitapos sa kinabuhi kanhi hepe sa tanod

CEBU, Philippines - Kanhi hepe sa mga tanod sa Barangay Carreta, ning dakbayan sa Sugbo gipusil patay pasado alas 2:30 sa kaadlawon, Hunyo 22, diha sa General Maxilom  diha sa maong barangay.

Usa ra ka bala ang mitapos sa kinabuhi ni Ernesto Villaflor, 55, human kini gipusil tumong sa ulo sa wala pa mailhing mamumuno.

Si SPO4 Alex Dacua, imbestigador sa Homicide Section sa Cebu City Police Office (CCPO) nga nahinabi sa Banat News mitug-an nga paingon unta mopalit og sigarilyo ang biktima sa usa ka tindahan dihang kini gipusil sa tawong nag-atang nang daan kaniya.

Sumala pa nga gitawag pa sa killer ang biktima ug sa iyang paglingi gidul-itan kini pagpusil sa agtang ug pagkahuman yano lang nga milakaw ang gunman palayo sa maong lugar. Dugang pa ni Dacua nga usa sa ilang gitutukan karon nga posibling anggulo mao ang kalabutan sa iyang kanhi trabaho isip hepe sa tanod sa maong barangay ug personal nga kaaway niini. (BANAT NEWS)