Mga polis sa “blue book” hayan taktakon—BAÑAS

CEBU, Philippines - Ang usa ka police official ug lima ka mga police non-commissioned officers kinsa anaa sa blue book sa napatay nga gipasanginlang drug lord sa Bohol posibleng mataktak sa serbisyo kung mapamatud-an nga sila mga drug protectors matud ni Chief Superintendent Prudencio Tom Bañas.

Si Bañas, Police Regional Office (PRO)-7 director, miingon nga gawas nga nailhan na sila nagtigom na sila karon og dugang mga ebidensiya ug witnesses sa pagprobar niini.

 â€œIf their (alleged) involvements are proved by evidence then they will all dismiss from the service,” matud pa ni Bañas.

Sa pagkakaron, gisubay na ang mga code names sa blue book sa kanhi polis nga gipasanginlang drug lord nga si PO1 Owen Rosales kinsa napatay kauban sa iyang lima ka mga sakop sa Bien Unido,  Bohol.

Ang mga code names gi-validate na karon sa mga imbestigador ug ang mga text messages nga anaa sa cellular phones ni Rosales. Ang unom ka mga pangalan nga anaa sa blue book matud pa aktibong mga polis.

Si Rosales usa sa mga napatay sa kapulisan sa shootout duha ka semana na ang nakalabay sa Bien Unido atol sa gihimong follow-up operation human sa pag-ambush sa hepe sa kapolisan sa lungsod sa Ubay  nga si Chief Inspector George Caña.  Si Rosales giingong mi-AWOL (Absent Without Official Leave) niadto pang 2010.

Tungod sa maong insidente, ang mga police directors ug city directors aduna nay direktiba sa pagtan-aw sa tanang AWOL nga pulis kung nalambigit ba sila karon sa ilegal nga buhat.

Si Bañas mipasidaan sa tanang kapulisan nga hunungon ang ilegal nga buhat kung dili sila gusto maunay sa ilang mga kauban sa serbisyo.

 â€œThey should stop otherwise we will follow them up and arrest them,” matud niini.

Napatay kauban ni Rosales,  sila si Amie Camero, Armando Quisto, Glenn Sayson, Junifer Bicada ug Carlito Kiamko. Kadtong mi-surrender sila si Roberto Olalo, Paolo Avenido, Orlando Garcia ug Joan Cajes.

Nakuha sa kapulisan ang upat ka .45 nga pistol, 9mm pistol, duha ka .38 revolvers, M-16 rifle, hand grenade, ug pipila ka pakete sa shabu (methamphetamine hydrochloride). (BANAT NEWS)