CPPO may kapabilidad nga makapakombikto og kriminal
CEBU, Philippines - Ang Cebu Provincial Police Office nangangkon nga aduna silay igong kapabilidad sa paghupot o pagproseso sa krimen ilabi na sa pagpasaka og kaso sa mga akusado aron sa malampusong prosekusyon sa kaso nga makapakumbikto sa kriminal.
Kini maoy tubag sa CPPO sa direktiba ni PNP Chief, Director Alan Purisima sa tanang kapulisan sa pagpalig-on sa investigative capability gikan sa police units ngadto na sa precinct level aron di masayang ang ilang kahago pagpanakop sa mga malapason sa balaod.
Si Senior Superintendent Noel Gillamac, CPPO director, miingon nga aduna silay gipahigayon nga Criminal Investigation Course aron madugangan pa ang skills ug abilidad sa mga imbestigador.
Adunay 60 ka mga police nga adunay ranggo nga Police Officer 1 ngadto na sa Senior Police Officer 1 gikan sa nagkadaiyang police stations ug police units ang gipailawom sa CIC sulod sa pipila ka buwan.
“This is a significant milestone of the CPPO because this is first in history of the CPPO to have this course,†matud ni Gillamac kinsa midugang nga ang CIC gigastuhan sa Provincial Government, local government unit ug gikan mismo sa kita sa PD’s Cup sa CPPO.
Gawas niini aduna ‘sab specialized training course alang sa Women’s and Children’s Protection Desk sa CPPO nga gihimo adtong Pebrero nga mi-pokus sa saktong paghupot sa kaso sama sa human trafficking ug pag-abuso sa kababayen-an ug kabataan.
Laing Training for Tourist Oriented Police for Community Protection ang gipahigayon usab nga mitutok sa problema nga naglambigit sa mga langyaw.
Sa bag-uhay lang nga command conference sa Camp Crame, si Purisima miawhag sa kapolisan nga kinahanglang mabatyagan sa katawhan ang gipanghimo sa mga polis kontra kriminalidad. (BANAT NEWS)
- Latest
