CEBU, Philippines - Gitun-an sa committee on laws sa konseho sa dakbayan sa Sugbo ang pag-veto ni Mayor Michael Rama sa Solo Parent Ordinance.
Apan alang kang Bise Mayor Edgardo Labella, balido ang gihimong veto ni Rama.
Gipasabot ni Labella nga naabot ang ordinansa sa buhatan ni Rama niadtong Mayo 14 samtang nibiyahe ang mayor sa Estados Unidos hinungdan nga giduso kini sa buhatan ni Labella isip acting mayor.
Apan si Labella nagdumili sa pag-aprobar sa ordinansa sanglit wala sa iyang gahum subay sa balaud ang pag-aprobar sa ordinansa nga napasar diin siya ang presiding officer.
Dihang mibalik na si Rama gikan sa biyahe, giduso pagbalik ang ordinansa sa iyang buhatan apan iyang gi-veto sa wala pa napupos ang napulo ka adlaw nga tagal.
Si Konsehal Gerardo Carillo miingon nga aprobado na ang ordinansa sanglit ning-abot na og 26 ka adlaw una pa nihatag og veto si Rama.
Ang Solo Parent Ordinance naghatag og ayuda sa mga lalaki o babaye nga adunay anak apan gibiyaan sa ilang bana, asawa o kapares samtang ang binuwang kita dili mosobra sa P6,000 matag buwan.
Aduna usab kini’y educational assistance alang sa mga bata, livelihood assistance package nga P5,000 ug financial assistance nga P5,000 matag tuig. (BANAT NEWS)