Lawaan I, Tabunok daghang krimen?
CEBU, Philippines - Nag-una ang Barangay Lawaan I ug Tabunok sa dakbayan sa Talisay nga adunay daghang krimen nga natala sa buwan sa Mayo.
Ang hepe sa Talisay City Police Station, Supt. Reycel Carmelo Dayon, mibutyag nga sa 15 ka insidente diin kasagaran pagpangawat, 30 porsiyento nahitabo sa duha ka barangay.
Si Dayon kinsa milingkod isip hepe niadtong Marso 27 mipasabot nga ang maong mga lugar maoy sentro sa komersiyo ug ang mga badlongon diha usab sa maong lugar mangita og biktimahon sa pagtoo nga kasagarang sa moanha sa Tabunok ug Lawaan I dunay dalang mga kwarta nga ipamalit.
Sa maong mga lugar nahimutang ang mall, supermarkets ug mga bangko ug sa Tabunok usab nahimutang ang merkado publiko.
Matud ni Dayon nga aron mapakgang ang mga kriminal sa pagbuhat og krimen, 24/7 silang magpahigayon og patrolya diha sa kadalanan sa siyudad.
Gawas niini may mga gidestino na mga polis nga mag-foot patrol sa Tabunok.
Matud ni Dayon nga gi-plot usab nila sa mapa ang mga lugar sa Talisay kung asa ang daghang mga insidente sa tulis, physical injuries ug uban pang krimen aron makita sa mga magpatrolya kung asa dapita nga lugar ang ilang i-focus.
Giangkon ni Dayon nga nagkinahanglan gyud sila og tabang sa komunidad pinaagi sa pagmabinantayon ug mosumbong ngadto sa polis kung dunay mga mabantayang dautang tawo. (BANAT NEWS)
- Latest
