CEBU, Philippines - Gitabangan og dunggab sa duha ka tawo ang usa ka barangay tanod sa Sitio Sambag Umapad Compound, Pajac, dakbayan sa Lapu-Lapu kagahapon sa kadlawon.
Ang biktima nga si Nicholas Dano Oyao, 54, nakaangkon og samad sa tiyan ug walang bukton hinungdan nga gidala sa Mactan Doctor’s Hospital sa iya mga kaubang tanod.
Sa pasiunang imbestigasyon ni PO3 Luisito Ernie nasuta nga ala-1 una kagahapon sa kadlawon gikan mihatud si Oyao sa iyang higala nga nakainom na sa panimalay niini.
Pagpauli ni Oyao iyang nakita ang duha ka tawo nga katahapan og lihok hinungdan nga iya kining gipasigaan sa iyang dalang flashlight tumong sa nawong.
Sa pagpalong ni Oyao sa iyang flashlight kalit nga mihamag ang duha ka tawo dayun dunggab gamit ang mahait nga hinagiban ug daling nisibat gikan sa lugar. (BANAT NEWS)