CEBU, Philippines - Gibutyag ni Sr. Supt. Rey Lyndon Lawas ang hepe sa Regional Investigation and Detective Management Division (RIDMD) nga misaka gyud ang krimen sa dakbayan sa Sugbo kompara sa miaging tuig. Gikompara ni Lawas ang krimin nga nahitabo sa Enero ngadto sa Abril miaging tuig ug karon ug nasuta niini nga misaka kini ngadto sa 22%.
Niadtong 2013 dunay 3,585 ka krimen ang natala sa kapolisan ug karong tuiga dunay natala nga 4,285. Sagad niining mga krimen mao ang index crimes o kadtong mga "crimes against persons and crimes against property". Ang crimes against persons naglakip sa murder, homicide, ug physical injuries samtang ang crimes against property tulis, kawat, kuot ug uban pa.
Niining tuiga, misaka sab sa 25% ang index crimes ug misaka sab ngadto sa 11% ang street crimes sa dakbayan.
Sa mga krimen nga natala, si Lawas miingon nga misaka ngadto sa 25% ang krimen sa dakbayan.
Misaka usab gikan sa upat ngadto sa 17 ka mga krimen ang nahitabo nga ang mga kriminal migamit og motor. Mihangyo si Lawas sa mga hepe sa kapolisan ug sa mga provincial ug city directors nga gamiton kining mga datus nga iyang nahipos aron basehan sa ilang deployment sa ilang mga tawo.
Matud pa niya, kung tarongon kini og gamit mamahimong mapugngan ug mamenosan pa ang krimen sa dakbayan. Sa sayong bahin ning buwana, ang city director sa dakbayan sa Sugbo Sr. Supt. Noli Romana miingon nga nakadiskubre siya og 700 ka mga kaso nga wala matala sa Fuente police niadtong miaging tuig mao nga kombinsido siyang mikunhod ang krimen sa dakbayan karong tuiga. (BANAT NEWS)