CEBU, Philippines - Gipahibawo sa Department of Environment and Natural Resources (DENR-7) nga ilang saulugon ang Philippine Environment Month karong bulan sa Hunyo nga may tema nga "Raise your voice, not the sea level." Sigon pa ni DENR-7 Regional Executive Director Isabelo Montejo nga ang maong kasaulugan agi og suporta sa United Nations kinsa niila sa tuig 2014 nga International year of Small Island Developing States (SIDS) nga nagtinguha sa pagpahigayon og public awareness aron kaprotektahan ang mga gagmay nga isla nga nameligro karong mapapas sa mapa kun malapawan na sa nagkataas nga sea level sa mosunod nga katuigan resulta ug epekto sa climate change.
Matud pa ni Montejo nga sa Hunyo 1 (karong adlawa) ipahigayon ang usa ka Run for the Environment nga gitawag og "Dagan para sa Kalikupan" nga magsugod sa alas 5:00 sa buntang didto sa Parkmal, Mandaue City nga pagasalmotan sa Cebu Climate Change Association Inc. diin ang matag partisipante magdala og usa ka seedling sa kahoy aron itanum. Sa Hunyo 5 nga giisip nga World Environment Day, ipahigayon ang dungan nga mangrove planting o ang pagpananum og mga pagatpat sa 14 ka mga coastal areas sa upat ka probinsiya sa Central Visayas.
Ipahigayon usab ang Environmental Stewardship Forum alang sa pag-promote og konkretong aksyon sa mga environmental issues ngadto sa Negros Oriental State University-Guihulngan City Campus; Bohol Island Sate University ug Cebu Technological University, Argao Campus sa Hunyo 17 hangtud sa Hunyo 19 ning tuiga. (BANAT NEWS)