CEBU, Philippines - Misaka ang kaso nga pagpanglugos sa dakbayan sa Mandaue sa unang upat ka buwan karong tuiga. Nasuta nga mas menos ra ang kaso sa pagpanglugos sa susama nga termino kaniadto’ng 2012.
Base sa crime statistics sa Mandaue City Police Office (MCPO) sa bulan sa Enero, Pebrero, Marso ug Abril niining tuiga nakatala sila og 15 ka pagpanglugos.
Mas taas kini kun itandi sa 12 lang ka rape cases nga ilang narekord sa mao gihapon nga mga buwan kaniadto’ng miaging tuig.
Ang kaso sa pagpanglugos sa dakbayan sa Mandaue sa una nga quarter sa tuig 2011 aduna la’y 10 ka kaso.
Si Senior Inspector Jimmy Portes, hepe sa Investigation Detection and Management Bureau (IDMB) sa MCPO miingon nga ang pagsaka sa rape cases nagpakita lang nga karong panahona ang mga biktima sa lugos dili na mahadlok mo-report sa kapolisan.
Matud ni Portes nga sa nangagi nga katuigan ang mga biktima sa lugos gawas nga mahadlok sa mga pagpanghulga sa naglugos kanila magpanagana usab pagtaho sa kapolisan tungod sa kaulaw nga sila nabiktima sa pag-among-among. (BANAT NEWS)