CEBU, Philippines - Hugot nga gibantayan sa kapolisan ang grupo nga magpalumba sa ilang motorsiklo sa Mandaue City Reclamation Area.
Si Chief Inspector Jesus Elmer Fernandez, hepe sa traffic division sa Mandaue City Police Office (MCPO), mibutyag nga adunay mga polis nga ilang gipakatap sa lugar human nadawat ang taho sa panaglumba sa motorsiklo panahon sa gabii. Tuyo nila nga madakpan ang maglumba apan matud pa ni Fernandez nga ang mga polis ra usab ang bantayan sa mga batan-ong grupo.
Gitug-an ni Fernandez nga magtapok sa usa ka tindahan sa reclamation area ang grupo hangtud kaadlawon diin manguli na usab ang mga polis nga nagbantay.
Si Jerome Ursal sa Command Center nga nag-monitor sa kahimtang sa kadalanan sa dakbayan miingon nga dili makuha sa ilang monitoring sa CCTV camera ang lumba.
Giingong mangita og mga dalan sa reclamation area ang mga motorista nga walay gibutang nga CCTV camera. (/GMR)(BANAT NEWS)