CEBU, Philippines - Moabot na sunod semana ang sinakong bugas nga kabahin sa 1.5 milyones ka sako gikan sa Vietnam.
Matud sa tigpamaba sa National Food Authority-7, Ma. Lucia Rosales, nga ang sinakong bugas gi-import alang sa Central ug Eastern Visayas nga naigo sa bagyong Yolanda.
Ang shipment maoy labing una sa bugas gikan sa Vietnan alang ning tuiga.
Si Rosales miingon nga mokabat lang sa 120 mil ka sako ang unang shipment sa barko gikan sa naasoy nga nasud.
Sa kinatibuk-ang gidaghanon, 700 mil ka sako ang gitagana alang sa Central Visayas samtang 800 mil sa Eastern Visayas.
Dugang ni Rosales nga mas dako ang gitagana sa Eastern Visayas tungod kay wala pa makabangon ang mga mag-uuma sa humay sa mga probinsiya sa Leyte, Samar ug kasikbit nga mga lugar human sa bagyong Yolanda sa niaging tuig. (BANAT NEWS)