CEBU, Philippines - Laing pugante gikan sa Tacloban City Jail atol sa bagyong Yolanda ang nasikop sa Punta Princesa Police sa dakbayan sa Sugbo human sa unom ka buwan nga pagtagotago.
Ang dinakpan naila nga si Roberto Llanto Trinidad alyas Bobby, 49, ulitawo, taga Barangay Pepito, dakbayan sa Tacloban kinsa may kaso sa pagpamaligya og ilegal nga drugas.
Matud ni S/Insp. Michealangelo Beltran, hepe sa Punta Prinsesa Police Station, nga duna sila’y nadawat nga report labot sa usa ka pugante nga nagtagotago sa may Salvador Extension, Labangon, dakbayan sa Sugbo.
Giingong matag alas 4 hangtud alas 6 sa hapon mogawas ang suspek sa balay aron pagpahangin hangtud nasikop sa kapolisan alas 6:30 sa hapon niadtong Lunes human kini migawas sa iyang gitagoan.
“Murag iyaha na nga routine, taga hapon mogawas na siya para seguro magpahangin, balik ra pod dayon sa interior,†matud ni Beltran.
Dugang ni Beltran nga ila na lang gipaabot ang mga tinugyanan sa Bureau of Jail Management and Penology sa Tacloban City aron mokuha sa dinakpan. (BANAT NEWS)