CEBU, Philippines - Patay ang usa ka lalaki nga gikan sa usa ka diskohan human kini pusila sa makaduha ka higayon sa usa ka barangay tanod sa Barangay Magcalape sa lungsod sa Asturias pasado alas-4 kagahapon sa kaadlawon.
Ang namatay naila nga si Daniel Alfonso Mahilom,19, molupyo sa nahisgutan nga lugar.
Samtang ang suspetsado naila nga si Danilo Mangitngit, nga molupyo sab sa samang barangay.
Matud pa’ng PO3 Joel Mata sa Asturias Police Station nga gikahinabi sa Banat News, nga ang biktima gikan nga midisko tungod kay nagsaulog kini sa ilang fiesta. Apan kalit kining gigukod sa suspek hangtud nga mihunong kini ug misukol sa suspek, tungod niini giibot sa tanod ang iyang armas nga giluklok sa iyang kiliran ug gipusil ang biktima sa makaduha ka higayon diha sa dughan ug ulo hinungdan sa iyang kamatayon.
Dihang nakamatikod ang mga tawo nga gipusil patay sa suspetsado ang biktima gialirongan dayon nila kini ug gitabangan og kulata hinungdan nga naka-angkon og grabing bun-og sa kalawasan.
Daling gidala sa Vicente Sotto Memorial Medical Center and suspetsado aron mapatambalan ang grabing bun-og nga iyang nahi-agoman. Gikahibudngan karon kun nganong dunay armas ang maong tanod nga wa man sila tuguti nga makadaladala niini. (BANAT NEWS)