CEBU, Philippines - Gidakop sa mga polis ang usa tawo nga misakay og taksi ug miplite kini og fake nga tibuok P500 ngadto sa drayber pag-abot nila sa Barangay Guizo, dakbayan sa Mandaue kaniadtong Biyernes sa kaadlawon.
Si PO1 Jerome Lendio, sakop sa Presinto 1 sa Mandaue City Police Office (MCPO), miingon nga ang dinakpan nagpaila si Jesus Ramon Osmeña, 30, ulitawo nga taga Barangay Cabancalan.
Matud ni PO1 Lendio nga ang dinakpan misakay sa taksi nga gimaneho ni Allan Dino gikan sa Banilad ug nagpahatod sa Barangay Guizo. Si Dino, 41 nga taga Barangay Lagtang, dakbayan sa Talisay nagduda nga peke ang kwarta nga gibayad sa iyang pasahero mao nga gipasusi niya kini sa mga polis nga nahiagi luwan sa patrol car.
Sila si PO1 Elson Delostrico ug PO1 Robert Remollo apil nga nagduda nga peke ang salapi maoy hinungdan nga ilang gidakop ang suspek ug gibalhog sa detention cell.
Kun mamatud-an nga peke g’yud ang kwarta nga gibayad sa nagpaila nga si Jesus Osmeña pasakaan siya’g kaso paglapas sa Article 168 sa Revised Penal Code. (BANAT NEWS)