CEBU, Philippines - Gitay-og na sad og intensity 2 nga linog ang dakbayan sa Sugbo kagahapong adlawa sa alas 5:53 sa hapon, sumala pa nga magnitude 3.4 ang nabatyagan sa Dagohoy, Bohol diin ang epicenter.
Ang Science Research Specialist sa Philippine Institute of Volcanology and Seismology (Phivolcs) nga si Rolando Montañez nga nahinabi sa Banat News nagkanayon nga wala mabatyagi sa ilang buhatan sa dakbayan sa Lapu-Lapu ang maong linog.
Apan miingon siya nga mitala sa ilang buhatan og Intensity 2 ang dakbayan sa Sugbo. Niadtong Biyernes mitay-og sab sa dakbayan sa Tagbilaran ang magnitude 3.6 nga linog nga nabatyagan sa Sugbo.
Ang maong linog miigo sa alas 12:31 sa udto nga mitala og intensity 2 sa dakbayan sa Lapu-Lapu.
Samtang sa alas 9:02 niadtong Huwebes mitay-og sab sa dakbayan sa Tagbilaran ang magnitude 3.1 nga linog.
Sa alas 05:33 sa sayong buntag sa samang adlaw gitay-og sab ang samang lugar og magnitude 3 nga linog apan wala kaayo mabatyagi ang maong mga linog.
Matud pa sa bulletin nga tectonic ang origin sa maong mga linog kon ang pagka-usab sa structure sa kina-uyokang bahin sa kalibotan. (BANAT NEWS)