Duha ka Italiano nanglungkab
CEBU, Philippines - Inay nga maglingaw-lingaw, sa prisohan nahagsa ang duha ka mga Italyano nga gipasanginlang nanglungkab sa opisina sa usa ka resort sa Barangay Talisay, Sta. Fe kagahapon sa kaadlawon. Ang gidakop giila nga sila si Luca Moscogiuri, 25, ug amigo niini nga si Giordano Favvri, 25, human sila nasakpan sa security guard sa Blue Coral and White Sands Beach Resort nga miguba sa pultahan sa opisina.
Matud pa nga hubog pa ang duha sa dihang gisikop kini sa mga polis. Matud ni PO3 Marino Cajes usa sa mga miresponde sa maong alarma nga sila si Moscogiuri ug Favvri anaa nag-abang sa Tristan’s Beach Resort, tapad lang nga resort sa Blue Coral and White Sands Beach Resort.
“Duna pa gani mi naabtan nga imnunon diha sa gawas sa pultahan sa ilang giabangan nga naa pay sulod…hubog gyud kaayo silang duha,†matud ni Cajes. Apan sa pag-abot sa duha sa maong resort gipanid-an kini sa security guard ug nakit-an sila nga milungkab sa maong opisina. Sa gihimong imbentaryo matud sa tagdumala sa resort nga nawala ang P1,565 cash nila.
“Na-blangko na sila unya wala na kuno mahinumdum…murag just for fun lang kuno,†matud pa ni Cajes.
Wa hinuoy plano ang tag-iya sa resort nga kasohan ang duha basta makig-settle sa duha kay dili man dako ang naguba. Ug kung magkasabot ang kampo posibleng makagawas ang duha Lunes na sa buntag. (BANAT NEWS)
- Latest
