PNoy di motambong sa Kadaugan sa Mactan

CEBU, Philippines - Gumikan sa kadaghan sa gimbuhaton ni Presidente Benigno Aquino III dili kini mahinayon sa pagtambong sa ikaduhang higayon sa pag-imbitar kaniya sa pagsaksi sa Kadaugan sa Mactan. Matud pa ni Commissioner Damian Gomez ang Chairman sa Lapu-Lapu City Tourism Commission dugay na nilang gipadala ang imbitasyon ngadto sa presidente apan hangtud karon wala gyud sila kadawat og tubag gikan sa Malacañang. Apan dunay nadungog nga balita gikan sa Malacañang nga usa ka under secretary ang ipadala isip representante ni Aquino.

Samtang gikalipay ni Mayor Paz Radaza nga nakakuha og kaalyado sa Senado kalabot sa dugay na kaayong hangyo sa lokal nga kagamhanan sa siyudad nga mahimo nang National Holiday ang Abril 27 nga maoy petsa sa unang kagawasan sa mga Filipino  batok sa mga mananakop.

Si Senador Jinggoy Estrada mipadayag nga mohimo siya og balaudnon nga maapil na sa national holidays ang petsa 27 sa Abril  agi og paghinumdom sa Battle of Mactan o Kadaugan sa Mactan. Matud pa ni  Estrada nakita niya ang pagsaulog  sa Cry of  Balintawak, Fall of  Bataan ug uban pang holidays nagpakita sa kapildihan sa mga Filipino batok sa mga langyaw.

Ang Kadaugan sa Mactan maoy pinakaunang pakigbisog ug kadaogan sa mga Filipino batok sa mga langyaw nga mananakop dihang ang Portugese nga si Ferdinand Magellan misuway pagsakop sa Mactan niadtong 1521.

Apan gikasagmuyo ni Estrada nga wala hatagi og bili sa National Historical Commission ang maong tipik sa kasaysayan ug wa gani mahatagi og tukmang pasidungog si Datu Lapu-Lapu nga maoy unang bayani sa nasud.  (BANAT NEWS)