Tulo gipamusil-patay niadtong Sabado ug Domingo

CEBU, Philippines - Tulo ka mga tawo ang gipamusil patay sa managlahing higayon sa lalawigan ug siyudad sa Sugbo sa milabay nga duha ka adlaw.

Patay si Bobby Rosal, 29, sa miaging gabii human kini gipusil sa wala mailhing tawo samtang natulog sud sa iyang balay sitio Liro, barangay Tabunan, ning dakbayan sa Sugbo.

Si Rosal ug ang iyang asawa namahulay sa ilang kwarto dihang usa ka lalaki ang midung-aw sa ilang bintana ug mipusil sa biktima nga nakaingon sa iyang kamatayon. Samtang gipusil patay ang usa ka Iken Ybañez, 32, molupyo sa barangay Ermita sa dakbayan sa Sugbo.

Patay usab nga napalgan ang usa ka Henry Hayag, 39,  diha sa kawayanan sa Sitio San Roque, barangay Lamac, Consolacion kagahapon sa buntag. Si Hayag taga Mandaue City.  ( Bryner Diaz ug Romeo T.  Limpangog/EIM)

Lima nalapwaha’g mantika ug lugaw

Lima ka mga tawo ang nangapaso ang kalawasan  dihang nakaligo sa nagbukal nga  lugaw ug  mantika dihang kalit lang miboto ang kerosene stove nga gitak-angan sa dakong kaldero ug dakong kawa diha sa merkado publiko sa Poblacion, dakbayan sa Lapu-Lapu kagahapon sa buntag.

Ang nangapaso mao ang tag-iya sa lugawan nga si Virgilio Soronio, ug upat niya ka trabahante nga sila si Jojo Casia, Marjun Tapot, 27, Arvin Dadolo, 21  ug Junie Troyo.

Si FO1 Vhemar Solatar, imbestigador sa Fire Station sa merkado publiko miingon nga aksidenteng mibuto ang tangke sa kerosene stove nga de-bomba dihang nagpadayon pa ang pagluto sa lugaw ug lumpia.

Matud pa ni Solatar nga ang pagbuto miresulta sa pagsilaob sa lutoanan. Napawong kini sa mga biktima ug sa  mirespondeng mga bombero  gamit ang fire extinguishers.

Ang mga biktima gidala sa tambalan sa  dakbayan sa Sugbo.

Nagtuo si FO1 Solatar nga nag-overheat og maayo ang tangke tungod kay kusog kaayo ang halin sa lugaw ug lumpia nianang mga tungora.  (BANAT NEWS)