CEBU, Philippines - Duha ka langyaw ang nasamdan human magkabangga ang ilang mga sakyanan niadtong Biyernes sa buntag sa kadalanan sa Barangay Poblacion, Alcantara, Cebu.
Ang Australyano nga si Nickolas Xantos, 63, nasamdan sa iyang agtang human iyang multicab mabanggai sa usa ka motor nga gimaneho sa usa ka German nga si Erwin Bleinagel, 72, kinsa nakaangkon og kadaot sa iyang lawas.
Ang duha ka langyaw daling gidala sa Alcantara Municipal Health Center, apan si Bleinagel gibalhin sa Badian District Hospital.
Sa pasiunang imbestigasyon sa kapolisan, kusog ang dagan sa German padulong sa amihanan ug misuway og overtake sa nag-una nga tricycle apan nabangga kini sa multicab ni Xantos nga padulong sa Moalboal.
Sa pagsusi sa kapolisan nahibaw-an nga expired na ang lisensya ni Bleinagel niadto pang Nobiyembre 6, 2013.
Pasakaan og kaso si Bleinagel tungod sa maong aksidente. (BANAT NEWS)