Duha ka lalaki naghikog

CEBU, Philippines - Usa ka empleyado sa Mactan Economic Processing Zone (MEPZ) ang napalgang patay sud sa iyang boarding house  diha sa sitio Arca, Pusok dakbayan sa Lapu-Lapu sa milabay’ng gabii.

Ang nagpakamatay giila nga si Jonas Arcayan, 26, residente sa maong  dapit. Matud pa ni SPO2 Manolito Abellanosa ug PO2 Jerson Alparito si Eleseo Gambe kauban ug higala ni Arcayan maoy nakadiskubre kaniya.

Sumala pa ni Gambe, sa milabay’ng Huwebes pa siya nagsige og text ni Arcayan apan wala kini motubag kaniya hinungdan nga nakahukom siya nga bisitahon kini, apan naka-lock kini sa sulod.

Gumikan niini gamit ang cellphone camera ni Gambe iyang gipasud iyang kamot ibabaw sa pultahan ug gi-video ang sud nga bahin sa maong lawak ug nakurat siya sa nakuha sa iyang video nga nagbitay na iyang amigo sa usa ka bakus diha sa liog.

Wala usab masayod si Gambe   ug mga kauaban sa boarding house kung unsay problema ni Arcayan gawas nga namatikdan kining magsige og hinuktok.

Samtang usa ka wa mailhing lalaki nga nakit-ang nilayat sa dagat sa South Road Properties ang nalumos niadtong Huwebes ug napalgan  pagkasunod adlaw diha na sa ilawom sa taytayan sa barangay Sawang Calero siyudad sa Sugbo.

Usa ka Joel Sultan maoy nakadiskubre sa maong patay’ng lawas kinsa daling mipahibalo sa  gwardiya nga si Juan Aranduque nga mao usab ang mitawag og polis.

Si PO2 Alex Capangpangan, usa sa mga miresponde mibutyag nga niadto pang adlaw nga Huwebes nila nabantayan ang maong lalaki nga milayat sa dagat ug gisuwayan pa unta kini pagluwas pinaagi sa pag-itsa og salbabida apan mibalibad kini.

Ang patay nga lawas anaa karon sa St. Francis Funeral Homes  aron didto mahimong adtoon sa mga tagtungod nga posibleng nawad-an og sakop sa ilang pamilya.  (BANAT NEWS)