Krimen sa probinsya mius-os matud pa sa CPPO

CEBU, Philippines - Gipasigarbo sa kadagkuan sa Cebu Police Provincial Office kon CPPO nga mi-ubos ang crime volume, index crime, ug non-index crime sa Siyudad sa Sugbo kun itandi kini sa miaging tuig.

Mibutyag si CPPO Chief Sr. Supt. Noel Gillamac nga ang panagtandi base sa miaging tuig, buwan sa Enero hangtod Marso gikompirmar sab sa Camp Crame.

Ang Crime Volume sa tuig 2013 aduna’y 4, 885 nga mga kaso samtang ang 2014 nakatali og 4,323 nga mga kaso.

Nunot niini, miubos og onse porsiyento kon 562 nga kaso ang crime volume karong tuiga.

Ang index crime sa tuig 2013 aduna sab 2,775 nga mga kaso samtang miubos kini og kinse porsiyento kon 427 ka mga kaso karong tuiga.

Ang kinadak-an nga naitali sa index crime mao ang pisikal nga kadaot (1,077 nga kaso), gisundan kini sa pagpangawat (752 nga kaso), pagpanulis (331 nga kaso), pangarnap (59 nga kaso), murder (56 nga kaso), homicide (40 nga kaso), ug rape (34 nga kaso).

Matud  ni Gillamac nga ang pisikal nga kadaot naglakip kini sa mga aksidente sa mga sakyanan.

Matud ni Gillamac, aduna’y mga taho nga ang mga tawo nagtuo nga mitaas ang krimen sa Sugbo hinungdan sa iyang pagpresentar sa mga detalye sa maong pagtandi sa crime volume ug crime index. (/EIM)(BANAT NEWS)