CEBU, Philippines - Gipangita karon sa kapolisan ang usa ka sinaligan sa usa ka fashion accessories factory sa Lower Tabok, dakbayan sa Mandaue nga gipasanginlang miunay og pangawat sa maong establisamento. Ang gipangita mao si Venny Molihon Dogo-oc, 31, taga Sitio Kamanggahan, Barangay Tabok, sa maong siyudad, nagtrabaho sa 4U Corporation nga manghimoay og fashion accessories. Nasuspetsahan si Dogo-oc human wala kini motungha sa trabaho sukad pa niadtong Lunes ug niadtong Huwebes gironda sa kapolisan ang iyang balay ug didto giingong nakita ang pipila sa mga gikawat nga mga butang.
Si Senior Inspector Jimmy Portes, hepe sa Investigation Detection and Management Bureau (IDMB) ug taga Presinto 3 gipangulohan sa hepe nga si Senior Inspector Genilo Masbate Veraque maoy mironda sa panimalay sa suspetsado.
Si PO3 Heracleo Gamboa sa Station 3 sa pakighinabi sa Banat News miingon nga wala silay search warrant pag-adto sa balay sa suspek apan matud pa nga sa pag-abli pa lang sa pultahan nakit-an nila ang pipila sa mga butang nga gikawat nga gitungtong sa lamesa nga gitumbok sa cashier sa maong establisamento nga si Jenny Rose Cortes nga mao ang mga butang nga gipangkawat niadto pang Lunes hinungdan nga kini gisakmit.
Ang nabawi sa kapolisan usa ka gold bar nga nagkantidad og P188,000, gold sheet nga nagkantidad og P94,000 ug salaping cash nga P25,000 nga tipik sa kantidad sa P120,000 nga salapi nga nahanaw sa kaha sa sulod sa ilang opisina.(/EIM) (BANAT NEWS)