CEBU, Philippines -Gipahibawo sa Department of Health (DOH-7) nga nakagawas na gikan sa tambalanan ang tanang mga nabiktima sa tipos didto sa barangay Montealegre, Tuburan.
Sigon pa ni Renan Cimafranca sa Regional Epidemiology and Surveillance Unit (RESU-7) nga ang katapusang tulo ka mga bata nga gitipos nakagawas sa tambalanan niadtong Miyerkules.
Si Cimafranca nagkanayon nga bisan og nangaayo na ang tanang 39 ka mga biktima sa tipos didto sa Tuburan, ang iyang mga sakop padayon nga nag-monitor sa tanang mga sitio ilabi na sa tinubdan sa tubig.
Gipadayon usab nila pagtudlo sa mga residente nga mo-chlorinate gyud sa tubig sa dili pa kini imnon ug sa pagpanglimpyo sa palibot aron di masagol sa ilang tinubdan sa tubig ang kagaw.
Nagpaabot pa ang RESU sa resulta sa laboratory test sa water sample nga ilang gikuha sa atabay ug ubang tinubdan sa tubig sa naasoy nga barangay pagtino sa matang sa kagaw nga nakatakboy sa mga tawo. (/EIM)(BANAT NEWS)