CEBU, Philippines - Hepe sa kapolisan sa dakbayan sa Talisay ang pailisan ni Mayor Johnny De los Reyes tungod kay giingong wala katuman sa iyang saad nga manakop og mga drug personalities matag semana.
Sa gipahigayong press conference niadtong Lunes si De los Reyes mibutyag sa mga tigbalita nga napakyas si Supt. Resty Santos sa iyang saad sa pagdakop og mga drug personality.
Giingong human sa pagpangronda sa National Bureau of Investigation (NBI) diha sa barangay Tabunok si Santos gipatawag kini sa mayor ug giingong ang hepe misaad nga modakop sila og tulo ka mga drug personality matag semana.
Apan matud ni De los Reyes nga wala katuman sa iyang saad si Santos hinungdan pailisan niya kini.
Matud ni De los Reyes nga sulod niining semanaha mosumitir siya og mga ngalan ngadto sa Cebu Provincial Police Office sa gusto niyang ipuling hepe sa kapolisan sa siyudad.
Gawas niini ang mayor nasagmuyo usab nga dunay mga polis nga nalambigit sa ilegal nga sugal.
Kagahapon sa buntag si Santos nga nahinabi sa Banat News nagkanayon kini nga mituman siya sa iyang saad kay matag semana duna sila’y tulo ka mga drug personality nga nadakpan.
Bisan nahiubos, nagpasalamat gihapon si Santos sa mayor nga gihatagan siya’g higayon nga makalingkod isip hepe sa kapolisan sa siyudad.
Dugang ni Santos nga wala siya’y problema nga mobiya sa Talisay tungod kay duna usab siya’ na-accomplish usa niini mao ang pagsumpo sa mga kaso sa kawat ug tulis sa Talisay.
Kahinumduman nga pipila na ka semana na ang milabay, gikatahong gipasanginlan ang kapolisan sa Talisay nga protektor sa ilegal nga drugas apan gihimakak kini ni Santos. (BANAT NEWS)