Pacquiao apil sa lineup ni Binay sa 2016

CEBU, Philippines - Si boxing superstar ug Sarangani Rep. Manny Pacquiao gikatahong malakip unya sa senatorial lineup ni Vice President Jejomar Binay sa 2016 national elections.

Kini maoy gibutyag ni Binay sa press conference kagahapon nga dunay panagsabot nga gihimo aron si Pacquiao maapil sa ilang lineup sugod pa niadtong 2013 midterm elections.

Gawas kang Pacquiao, buot usab nga ikauban ni Binay sila si Senator Jinggoy Estrada o ba kaha si Batangas Governor Vilma Santos-Recto isip mamahimo niyang running mate.

Si Estrada, usa karon sa mga naapil sa mga gikasohan tungod sa "pork barrel" scam  tungod sa giingong pagkawkaw sa Priority Development Assistance Funds pinaagi sa mga peke nga non-government organizations nga giingong hinimo-himo lang sa gipriso usab karong si Janet Lim-Napoles. - Philstar/EIM (BANAT NEWS)