CEBU, Philippines - Namatay ang usa ka motorista nga napunggit sa iyang gikasugat nga trailer truck samtang nagdagan kini subay sa national highway sa Barangay Magay, Compostela kaniadtong Domingo sa gabii.
Ang namatay mao si Edmund Sarsalejo, 33, taga Barangay San Vicente, dakbayan sa Bogo. Ang trailer truck nga nakadam-ag sa biktima gimaneho usab ni Rolando Castro, 43, taga barangay Dancar, dakbayan sa Danao.
Si SPO1 Jaime Maroleña, imbestigador sa traffic section sa Compostela police station, miingon nga nagdagan paingon sa dakbayan sa Danao ang trailer truck apan pag-abot niini sa maong lugar kalit kining mipabulhot pagpadagan ug mi-overtake sa nag-una nga sakyanan.
Matud pa nga sa pag-overtake ni Castro iyang nabanggaan ang motorsiklo nga gimaneho ni Sarsalejo hinungdan nga nalagpot pa kini og pipila ka metros nga gilay-on. Bisan og nagsul-ob pa og helmet ang biktima apan nakasinati gihapon og grabeng kadaut sa lawas ug patay na kining daan sa pag-abot sa Danao District Hospital.
Ang drayber sa truck mitahan ngadto sa kapolisan ug gitanggong sa detention cell samtang giandam pa ang kaso nga ipasaka batok kaniya. -(/RUB)(BANAT NEWS)