CEBU, Philippines - Usa ka babaye gituohang nalanag sa tubig human kini miinom sa mineral water gikan sa refrigerator sa motel sa dakbayan sa Lapu-Lapu diin siya mi-check-in uban sa iyang higala kagahapon sa kaadlawon.
Ang nalanag mao si Lourda Laborte Fujita, 42, biyuda, lumad sa Barangay Basdiot, lungsod sa Moalboal.
Sa imbestigasyon ni PO1 Jomar Florentino sa homicide section nasuta nga mga alas 12:00 sa tungang gabii niadtong Miyerkules si Fujita uban ang higala niini nga si Joseph Barnego, 23, residente sa Barangay Marigondon, dakbayan sa Lapu-Lapu misulod sa motel aron mopahulay.
Mga alas 4:00 sa kaadlawon kagahapon dayong uli sa duha gisugo ni Fujita si Barnego og kuha og mineral water gikan sa refrigerator sulod sa lawak nga ilang giukopahan.
Giingong human og inom ni Fujita sa tubig kalit nga naminhod ang iyang lawas ug naglisod sa pagginhawa.
Si Fujita mipugos kini sa pagsuka sa giinom nga tubig apan dugo ang migawas gikan sa iyang baba hinungdang dali siyang gidala ngadto sa Mactan Doctors Hospital.
Ang botilya sa tubig nga aduna pay nabiling sulod gisumitir ngadto sa PNP Crime Laboratory aron mapaubos sa "toxic examination."
Nagduda ang kapolisan nga dunay nasagol nga kemikal ang botilya sa mineral water nga nainom sa maong babaye. (BANAT NEWS)