CEBU, Philippines - Nadunggaban patay ang usa ka traysikad drayber sa iyang silingan sa miaging gabii sa sitio Miramar, barangay Poblacion, dakbayan sa Talisay.
Ang biktima mao si Rodrigo Pansoy, 25, molupyo sa nahisgotan nga lugar. Samtang ang suspetsado naila nga si Edward Paran, 21, molupyo sa samang dapit.
Base sa imbestigasyon sa kapolisan, naglingkod sa iyang traysikad gawas sa iyang balay ang biktima dihang kalit giduol sa suspetsado ug gidiretso og dunggab.
Daling gidala ang biktima sa Talisay City District Hospital apan gideklarar na kini nga patay na.
Sa follow-up investigation nga gipahigayon sa kapolisan, nasikop ang suspetsado ug nakuha gikan kaniya ang usa ka 12- pulgadas nga kutsilyo nga gituohang maoy gigamit niini sa pagdunggab sa biktima.
Si PO1 Emmanuel Deluvio, desk officer, miingon nga posible nga nagdumtanay na ang duha kaniadto pa. (BANAT NEWS)