CEBU, Philippines - Kapulisan sa Oslob gireklamo nga namun-og ug nangguba og mga butang atol sa usa ka operasyon batok sa illegal nga drugas sa Sitio Rosario Barangay Gawi, Oslob sa miaging hapon.
Ang gireklamo mao si Insp. Christopher Castro ug kaubanan niini sa Oslob Police Station.
Si Jonathan Gonzalgo, 28, nga misaysay dinhi sa The Freeman ug Banat News nga pasado alas 11 sa buntag niadtong Biyernes dunay mga polis nga niabot sa balay sa iyang apuhan diin sila nagpuyo sa iyang mabdos nga asawa ug usa nila ka anak.
Matud pa niya nangita ang mga polis sa gihinganla’g “JR†apan iyang gitubag nga wa siya’y kalibotan kun kinsa ang ilang gipangita.
“Ako’y ilang gipangutana kay diha man ko sa hagdanan duol . Wa ko kabalo kinsa na siya. Wa koy ikahatag nga idea kay bag-ohay pa man ko diha,†sigon ni Gonzalgo.
Apan giingong nasuko ang usa ka polis ug gipasanginlan siyang gitagoan niya ang ginganlan og “JR†ug kalit siyang gibukbok sa bukobuko sa armas niini. Dihang gibadlong kini sa iyang asawa, gitionan kini og armas sa maong polis.
Samtang ang iyaan ni Gonzalgo nga si Maria Lourdes Rizon mibutyag nga mipabuto ang usa ka polis og kapin traynta ka higayon atubangan sa panimalay sa iyang igsuon ug gisaka ang balay ug giguba ang mga kabtangan.
“ Nagpabuto og lapas 30 ka buto. Mura’g nangita og nakapatay nga tawo,†sigon ni Rizon.
Gibutyag usab ni Rizon nga gikuha sa mga polis ang P8, 000 niya nga kwarta, singsing ug pulseras. Gisaysay usab ni Rizon nga human sa hitabo, giingong wa usab sila gitagaan og higayon nga magpa-blotter sa police station sa Oslob aron unta gamiton sa pagpangayo sa medico-legal alang kang Gonzalgo.
“Miana man ang police nga di sila makahatag sa blotter kay wa na nahitabo tanan. Giingnan pa mi og pwede man gani na namo dauban nang inyong balay,†matud ni Rizon.
Modangop karong Lunes si Rizon ug Gonzalgo ngadto sa buhatan sa National Bureau of Investigation ug Human Rights Commission aron ireklamo ang kabangis sa mga polis.
“Ako lang kay nganong iya kong gibunalan nga wa man koy gihimo. Wa gani ko maningka niya. Wa koy gibuhat nga makainit sa iyaha,†sigon ni Gonzalgo. Apan gihimakak ni Castro ang mga alegasyon kay lehitimo ang ilang gihimo nga operasyon batok kang Claudio Cabugwas, 48, taga-Barangay Pugalo, Alcoy; ug John Rey Lacuña, 19, taga-Barangay Gawi, kinsa anak sa kapitan sa maong barangay nga si Guillermo Lacuña.
Ang duha nasikop lakip kang Jovert Marinduque, 27, taga-Guihulngan Negros Oriental; Bobby Russel, 30, taga-Barangay Opra, Cebu City; ug Rendo Marinduque, 23, nga taga Barangay Gawi. Nakuha sa kapulisan ang unom ka gagmay’ng pakete sa shabu, P1,800 nga matud pa halin, cellular phone, disposable lighters ug nagkadaiyang drug paraphernalia.
Matud ni Castro nga midagan ang mga suspek ug ang usa didto kini paingon sa balay ni Gonzalgo.
“Apilon pa na namo sila og pasaka og kaso nga obstruction of justice,†bahad pang Castro dihang gikahinabi sa The FREEMAN ug Banat News sa telepono. Si Castro midugang nga wa sila makasulod sa balay maong imposible ang mga pasangil nga duna silay gipangguba ug gipanguhang mga butang. (BANAT NEWS)