Mga nasunogan sa Warwick ug sa Barracks papuy-on sa tents
CEBU, Philippines - Ang ubang mga biktima sa sunog sa Warwick-Barracks Market sa Barangay Ermita duha ka semana na ang milabay temporaryo nga papuy-on ilawom sa viaduct nga nahimutang duol sa Sitio Bato.
Ang kadagkoan sa Local Disaster Risk-Reduction Management Office (LDRRMO) nag-andam og 50 ka tulda nga gidonar sa Red Cross aron maoy ipagamit sa mga hingtungdang pamilya.
Si Alvin Santillana nga maoy assistant chief sa LDRRMO miingon nga tumong nila nga mamiya ang maong nahisgutang pamilya sa nasunogan kay aron masugdan na nila ang paghawan sa dapit.
Si Mayor Michael Rama daan na nga mipahibalo nga dili na siya motugot nga ang dapit sa Warwick-Barracks puy-an gihapon og mga tawo kay ang mao nga lugar gitagana isip merkado.
Ang Warwick-Barracks gipuy-an sa mga tawo nga nagtukod na og panimalay sa kaniadto merkado nga nahimutang tupad sa Carbon Market Unit-1.
Matud ni Mayor Rama nga usbon niya ang disinyo sa Freedom Park Market diin palapdan niya kini pinaagi sa paglakip na sa kabahin sa kaniadto Warwick Barracks.
Mahimo kini pinaagi sa pagsibog sa dalan El Felibusterismo, ang karsada nga nag-uwang sa Freedom Park ug Warwick Barracks Markets.
Kadtong tinuod nga naninda g’yud sa Warwick Barracks balhinon sa dapit sa Freedom Park samtang ang mahabiling lugar sa Warwick himoon nga parking area. (BANAT NEWS)
- Latest
