CEBU, Philippines - Usa ka kanhi kapitan sa barangay napalgang patay didto sa sitio Along-ong, barangay Bulangsuran lungsod sa Samboan alas 7:40 sa buntag sa miaging adlaw.
Ang kanhi kapitan naila nga si Edilberto Basay Esparcia, 53, minyo, molupyo sa barangay Calatagan, lungsod sa Samboan ug kanhi kapitan sa maong dapit.
Si Oliva Balbona mismo ang mitawag sa kapolisan sa Samboan Police Station human niya hikit-i ang patay’ng lawas sa kanhi kapitan nga nagbay-ad sa yuta.
Gikonpirmar usab kini sa kapolisan nga gipangunahan ni PO3 Leopoldo Godinez uban nila ni PO3 Oscar Ferrater, PO3 Bethoven Rocamora Jr., PO3 Sepjanrey Roda, PO2 Joseph Rodney Belangoy ug PO1 Jason Hiramis, apil ang mga municipal health personnel nga sila si Freddie Dinopol ug Charlene Hernandes.
Basi sa imbestigasyon sa kapolisan nga nakita sa mga residente sa naasoy’ng lugar ang kanhi kapitan nga nagsakay sa iyang motor uban ang usa ka babaye paingon sa sitio Along-ong. Apan ilang nasuta nga wala’y sinyales sa pagpangawat kay wala may nawala sa iyang mga butang.
Sigun pa sa mga municipal health personnel nga mirespondi sa maong panghitabo, nakasinati ang kanhi kapitan og cardio vascular hypertension ug wala usa’y foul play ang iyang kamatayon.
Daling gidala ngadto sa MJ Cuenco Memorial Hospital sa lungsod sa Malabuyoc apan gideklara kining dead on arrival ni Dr. John Bascuña.
Sumala pa ni PO1 Hiramis nga padayon pa nilang gisubay kun kinsa ang babaye nga kuyog sa kanhi kapitan. (BANAT NEWS)